വ്യക്തിപരമായ കാര്യങ്ങൾ മാറ്റി നിർത്താം, നടൻ എന്ന നിലയിൽ വിനായകൻ വളരെ അച്ചടക്കമുള്ള വ്യക്തി; മമ്മൂട്ടി

മമ്മൂട്ടിയെ നായകനാക്കി ജിതിൻ കെ ജോസ് സംവിധാനം ചെയ്യുന്ന സിനിമയാണ് കളങ്കാവൽ. സിനിമയിൽ വിനായകനെ സജസ്റ്റ് ചെയ്തിരുന്നത് മമ്മൂട്ടിയായിരുന്നു എന്ന വാർത്ത ആരാധകർ ആഘോഷിച്ചതാണ്. ഇപ്പോഴിതാ ഒരു നടൻ എന്ന നിലയിൽ വിനായകൻ വളരെ അച്ചടക്കമുള്ള വ്യക്തിയാണെന്ന് പറയുകയാണ് മമ്മൂട്ടി. ആത്മാർത്ഥത, കഠിനധ്വാനം സത്യസന്ധത ഇതെല്ലം വിനായകനിൽ ഉണ്ടെന്നും മമ്മൂട്ടി പറഞ്ഞു. മമ്മൂട്ടി കമ്പനിയ്ക്ക് നൽകിയ അഭിമുഖത്തിലായിരുന്നു പ്രതികരണം.

'വിനായകന്റെ സിനിമ ജീവിതം എപ്പോഴും ഒരു അത്ഭുതത്തോടെയാണ് നോക്കിക്കണ്ടിട്ടുള്ളത്. ആത്മാർത്ഥത, കഠിനധ്വാനം സത്യസന്ധത പ്രധാനമായും ഈ മൂന്ന് കാര്യങ്ങൾ കൊണ്ട് മാത്രമേ ഒരു അഭിനേതാവിന് ജീവിതത്തിൽ വിജയിക്കാൻ സാധിക്കുകയുള്ളൂ. നമുക്ക് വേണ്ടി അഭിനയിക്കാൻ വേറെ ആരും വരില്ല, നമ്മൾ തന്നെ അഭിനയിക്കണം. അതുകൊണ്ട് തന്നെ നമ്മൾ ജീവിതത്തിൻ ഡെഡിക്കേറ്റഡ് ആയിരിക്കണം അതോടൊപ്പം തന്നെ സിംപിൾ ആയിരിക്കണം. ഇതെല്ലാം ഞാൻ വിനായകനിൽ കണ്ടിട്ടുണ്ട്.

അദ്ദേഹത്തിന്റെ ജീവിതത്തിൽ വ്യക്തിപരമായ മറ്റനവധി കാര്യങ്ങളുണ്ട് അത് മാറ്റി നിർത്താം. നടനെന്ന നിലയിൽ വളരെ അച്ചടക്കമുള്ള വ്യക്തിയാണ്. അതുകൊണ്ട് തന്നെയാണ് അത്രത്തോളം കഥാപാത്രങ്ങൾ അദ്ദേഹത്തിനു വരുന്നതും വളരെ മികച്ചതാക്കി മാറ്റാൻ സാധിക്കുന്നതും. ഏതൊരു അഭിനേതാവായാലും ശരി ഇൻഡസ്ട്രിയിൽ നിലനിൽക്കണമെങ്കിൽ അവർ പെർഫോം ചെയ്ത് പ്രേക്ഷകനെ കൺവിൻസ് ചെയ്യണം. അതു തന്നെയാണ് വിനായകന്റെ ഏറ്റവും വലിയ വിജയവും ഇപ്പോൾ ഇങ്ങനെയൊരു പൊസിഷനിൽ എത്തി നിൽക്കുന്നതിന്റെ രഹസ്യവും' മമ്മൂട്ടി പറയുന്നു.

ഏവരും ആകാംഷയോടെ കാത്തിരിക്കുന്ന ചിത്രം ഡിസംബർ അഞ്ചിന് പുറത്തിറങ്ങും. ഒരു നീണ്ട ഇടവേളയ്ക്ക് ശേഷം മമ്മൂട്ടിയുടേതായി തിയേറ്ററുകളിൽ എത്തുന്ന ഈ ചിത്രത്തിന് ഒരുപാട് പ്രതീക്ഷയാണ് ഉള്ളത്. ഒരു ഗംഭീര ക്രൈം ആക്ഷൻ ത്രില്ലർ ചിത്രമായിരിക്കും കളങ്കാവൽ എന്നാണ് ട്രെയ്‌ലർ നൽകിയ സൂചന. "നിലാ കായും" എന്ന വരികളോടെ ആരംഭിക്കുന്ന ഈ റെട്രോ ഫീൽ നൽകുന്ന ഗാനത്തിന് വമ്പൻ പ്രേക്ഷക പ്രതികരണമാണ് ലഭിച്ചത്. ജിഷ്ണു ശ്രീകുമാറും ജിതിൻ കെ ജോസും ചേർന്ന് തിരക്കഥ രചിച്ച കളങ്കാവൽ മമ്മൂട്ടി കമ്പനിയുടെ ബാനറിൽ നിർമ്മിക്കുന്ന ഏഴാമത്തെ ചിത്രമാണ്.

ചിത്രത്തിൻ്റെ ടീസർ, പോസ്റ്ററുകൾ എന്നിവയും പ്രേക്ഷകർക്കിടയിൽ സൂപ്പർ ഹിറ്റാണ്. സെൻസറിങ് പൂർത്തിയാക്കിയ ചിത്രത്തിന് U/A 16+ സർട്ടിഫിക്കറ്റ് ആണ് ലഭിച്ചത്. വലിയ പ്രതീക്ഷയും ആകാംഷയുമാണ് ചിത്രത്തെ കുറിച്ച് പ്രേക്ഷകർക്കുള്ളത്. ദുൽഖർ സൽമാൻ നായകനായെത്തിയ സൂപ്പർഹിറ്റ് ചിത്രം 'കുറുപ്പ്'ന്റെ കഥ ഒരുക്കി ശ്രദ്ധ നേടിയ ജിതിൻ കെ ജോസ് ആദ്യമായ് സംവിധാനം ചെയ്യുന്ന ചിത്രമാണ് കളങ്കാവൽ. ഏഴു മാസത്തെ ഇടവേളക്ക് ശേഷം തീയേറ്ററുകളിൽ എത്തുന്ന മമ്മൂട്ടി ചിത്രമെന്ന നിലയിൽ വലിയ ആവേശത്തോടെയാണ് മലയാള സിനിമാ പ്രേമികൾ കളങ്കാവൽ കാത്തിരിക്കുന്നത്.

Content Highlights:  Mammootty says Vinayakan is a very disciplined actor